ჩემი ხელით (2)

ადრე სოფის და ტომას დავპირდი, რომ კიდევ გამოვფენდი ხელნაკეთობებს. ბოლო დღეები სახლს ვალაგებდი, ჰოდა, გადმოვაწყე რაღაცები. ახლა ამათ დავდებ: ყაისნაღით მოქსოვილი ჩანთა და საქსოვი ძაფის კოჭი, რომელიც, მას მერე რაც მოვხატე, ლარნაკია (თუმცა უძირო, ამიტომ ხელოვნურ ყვავილებს თუ ჩავაწყობ) :)

 

იკვრება ღილებით

 

 

ჩემი ცხვარი

საძერწი თიხა იდეაში აქსესუარებისთვის ვიყიდე და ისე მოხდა, რომ პარასკევს აი ეს შემომეძერწა. განწყობა მქონდა ასეთი. ახლა გაშრა და აკრილით შევღებავ. მანამდე ჩიტები გავაკეთე და მათ, როცა მანქანაში დავაბინავებ, მერე გაგაცნობთ. ახლა რომ ვფიქრდები, ჩიტები და ცხვრები ჩემთვის განსაკუთრებული არსებებია. ჰოდა აღარ მიკვირს, ჯერ ისინი რომ გამოვძერწე სამკაულების ნაცვლად – როგორ, ამას ალბათ  მნიშვნელობა არ აქვს.

ჩემი ხელით

ამ მხრივ რომ რაიმე მეხერხება, როგორც მახსოვს, არასდროს მომიყოლია ბლოგზე. ჰოდა, ახლა მოვყვები. ძალიან მომწონს ხელნაკეთი ნივთები – ნაქსოვი, შეკერილი, სხვადასხვა მასალით დამზადებული და მეც, თუ დრო მაქვს და ხალისი, ვაკეთებ. განსაკუთრებით სკოლის და სტუდენტობის პერიოდში ვიყავი მონდომებული, მერე და მერე კი ძალიან გავზარმაცდი. აი ამ ხელთათმანებსაც ზუსტად სამი თვე ვქსოვდი, არადა ერთი კვირის საღამოებიც ეყოფოდა; მაგრამ მაინც კარგია – ჯერ კიდევ ცივა და შეიძლება ჩაცმა :) თან ის მიხარია, რომ ასეთი არავის აქვს, თან ჩემს ქურთუკსაც უხდება. მოქსოვილია ყაისნაღით და ჩხირებით.